Alfreð Þorsteinsson, fyrrverandi borgarfulltrúi og framkvæmdastjóri, er látinn, 76 ára að aldri. Frá þessu er greint á heimasíðu knattspyrnufélagsins Fram þar sem Alfreð var heiðursfélagi auk þess að gegna formennsku félagsins.
Alfreð var fæddur 15. febrúar 1944 og hóf ungur störf í blaðamennsku. Starfaði hann á Tímanum frá 1962 til 1977.
Alfreð var borgarfulltrúi Framsóknarflokksins á árunum 1971 til 1978 og aftur frá 1994 til 2006. Þá var hann stjórnarformaður Orkuveitunnar frá 1999 til 2006. Alfreð var forstjóri Sölu varnarliðseigna frá 1977 til 2003.
Hann spilaði knattspyrnu með yngri flokkum Fram og þá þjálfaði hann yngri flokka félagsins. Hann var formaður knattspyrnudeildar Fram frá 1965 til 1966 og var tvisvar formaður félagsins, fyrst 1972 til 1976 og svo frá 1989 til 1994. Hann var gerður að heiðursfélaga Fram á 90 ára afmælishátíð félagsins árið 1998.
Alfreð lætur eftir sig eiginkonu, Guðnýju Kristjánsdóttur. Dætur þeirra eru Lilja Dögg menntamálaráðherra og Linda Rós guðfræðingur.
