Alfreð Gíslason, einn reynslumesti handboltaþjálfari okkar Íslendinga og núverandi landsliðsþjálfari Þýskalands, er í einlægu viðtali við þýska blaðið Bild.
Alfreð hefur verið að gera góða hluti með Þjóðverja á yfirstandandi heimsmeistaramóti en í viðtalinu ræðir hann meðal annars um hvernig ástin fann hann á nýjan leik. Fréttablaðið fjallaði um viðtalið í gærkvöldi.
Alfreð hafði áður gengið í gegnum afar erfiða tíma í tengslum við veikindi og fráfall eiginkonu sinnar, Köru Guðrúnar Melsteð sem lést undir lok maí árið 2021 eftir baráttu við krabbamein. Eins og bent er á í umfjöllun Fréttablaðsins var það ekki á döfinni hjá Alfreð að finna ástina á nýjan leik en lífið hafði annað í huga. Alfreð fann nefnilega ástina í örmum Hrundar Gunnsteinsdóttur.
„Þetta gerðist bara,“ segir hann í viðtalinu og lýsir því hvernig Hrund, sem er framkvæmdastjóri Festu, hafi haft samband við hann eftir viðtal sem Alfreð veitti Snorra Björnssyni í hlaðvarpsþætti þess síðarnefnda.
„Hún (Hrund) skrifaði mér og bað um viðtal við mig. Ég sagði við hana að næst þegar að ég yrði á Íslandi gæti ég svarað hennar spurningum,“ segir Alfreð. Á meðan á samtali þeirra stóð kom í ljós að faðir Hrundar, Gunnsteinn Skúlason, fyrrum handboltakempa, hafi verið aðstoðarþjálfari landsliðsins í fyrsta landsliðsverkefni Alfreðs sem leikmaður.
„Ég veitti henni viðtal og var á leið til Akureyrar að hitta fjölskylduna mína degi eftir það. Ég sagðist myndu koma aftur í næstu viku og sagði að við ættum þá að borða saman. Það var svona sem þetta byrjaði, algjörlega óvænt.“
