Alexandra Briem, forseti borgarstjórnar og borgarfulltrúi Pírata, skilur ekki hvernig Ásmundi Friðrikssyni, þingmanni Sjálfstæðisflokksins, tókst að ferðast fyrir 34 milljónir frá árinu 2013.
„Þetta er svakalegt. 34 milljónir króna frá árinu 2013? Ég skil alveg að maður í dreifðu kjördæmi þurfi að keyra svolítið til að hitta fólk og svona, en þetta er fáránlegt,“ skrifar Alexandra og deilir frétt Kjarnans um ferðakostnað Ásmundar frá því hann settist á þing.
„Ég efast um að minn ferðakostnaður frá fæðingu nái upp í þessa upphæð, jafnvel þó ferðalög erlendis væru talin með.
Ég bara einfaldlega trúi því ekki að þetta sé satt. Og sérstaklega ekki að það geti verið að þetta sé allt ferðakostnaður vegna þingmennsku, en ekki vegna prófkjöra eða persónulegra erindagjörða,“ skrifar Alexandra enn fremur.
