Ágúst Ólafur Ágústsson, þingmaður Samfylkingarinnar, hefur varpað fram sjö spurningum til stjórnarliða nú þegar kórónuveirufaldurinn geisar.
Eins og greint var frá í vikunni lagði stjórnarandstaðan fram ýmsar tillögur til viðbótar við þær efna-hags¬að¬gerðir sem ríkis¬stjórnin lagði fram. Ágúst Ólafur veltir þessu fyrir sér og segir að auðvelt hefði verið að samþykkja þessar tillögur og aukinheldur hefðu þær ekki sett neitt á hliðina.
Spurningarnar eru svohljóðandi:
- Af hverju kusu stjórnarþingmenn fyrir einungis þremur dögum gegn tillögum í þinginu um sérstakar álagsgreiðslur til starfsfólks í heilbrigðis- og félagsþjónustu vegna umönnunar Covid-smitaðra sjúklinga? Af hverju eru meira að segja þær vaktagreiðslur sem voru nú þegar hjá hjúkrunarfræðingum látnar falla núna niður, af öllum tímum? Og af hverju er ekki búið að semja við heilbrigðisstéttir?
- Af hverju kusu stjórnarþingmenn gegn tillögu á Alþingi um aukinn stuðning við fjölskyldur langveikra barna sem hafa orðið fyrir tekjutapi vegna faraldursins?
- Af hverju kusu stjórnarþingmenn nú gegn eingreiðslu til eldri borgara eins og öryrkjar fá?
- Af hverju kusu stjórnarþingmenn á mánudaginn sl. gegn tillögu um aukna fjármuni til nýsköpunar, listafólks og íþróttastarfs en sú starfsemi er lömuð vegna faraldursins?
- Af hverju kusu stjórnarþingmenn gegn tillögum um frekari flýtingu mannaflsfrekra framkvæmda. s.s. við Reykjanesbraut, Suðurlandsveg, Vesturlandsveg, Akureyrarflugvöll og á höfuðborgarsvæðinu?
- Af hverju kusu stjórnarþingmenn gegn tillögum um aukið fé til fatlaðs fólks, fólks á leigumarkaði og SÁÁ en tekjur þeirra hafa hrunið vegna faraldursins?
- Af hverju kusu stjórnarþingmenn í þessari viku gegn lækkun tryggingargjalds á lítil fyrirtæki og gegn auknu fé til hjúkrunarrýma?
Ágúst Ólafur segir að allt séu þetta tillögur sem hefði verið auðvelt að samþykkja. Þá séu þær þannig úr garði gerðar að þær hefðu ekki sett þjóðfélagið á hliðina.
„Þvert á móti eru þetta tillögur sem eru bráðnauðsynlegar núna, ekki síst í ljósi þess að aðgerðarpakki ríkisstjórnarinnar er allt að helmingi lægri en hjá nágrannaþjóðum okkar. Af hverju er ekki gert meira núna fyrst stjórnarliðar tala um að gera meira? Af hverju?“
