Aftur var krotað yfir hinsegin fána á tröppum Grafarvogskirkju í gær. Þetta kemur fram á Facebook síðu Grafarvogskirkju.
„Núna var það textinn LEVITICUS 20:13, sem er tilvitnun í 3. Mósebók í Biblíunni, þar sem segir: ,,Leggist karlmaður með karlmanni eins og þegar lagst er með konu fremja þeir báðir viðurstyggilegt athæfi. Þeir skulu báðir líflátnir. Blóðsök þeirra skal koma yfir þá"
Grafarvogskirkja bendir viðkomandi vinsamlegast um að lesa alla biblíuna og minnir fólk á að í sama kafla er fullt af boðskap sem á ekkert erindi í dag.
„Í sama kafla eru líka ýmis ákvæði um að lífláta skuli fólk fyrir aðrar sakir, s.s. að ,,bölva föður sínum eða móður", einnig á að lífláta fólk sem sefur hjá einhverjum tengdum sér, t.d. mági eða tengdadóttur og ef karlmaður sefur hjá konu á blæðingum, á að lífláta þau bæði.
Við í Grafarvogskirkju kjósum frekar að fylgja boðskap Jesú Krists, sem sagði okkur að elska hvert annað. Við trúum því að hver einasta manneskja sé elskuð sköpun Guðs sem hefur leyfi til að lifa því lífi sem henni/háni/honum er áskapað.
Boðskapur Jesú Krists er í fullu samræmi við mannréttindayfirlýsingar, og við í Grafarvogskirkju stöndum með mannréttindum og berjumst gegn hatri og fordómum,“ segir í færslu Grafarvogskirkju.
