Hópsmit meðal íbúa í Mýrdalshreppi tengist afbrigði kórónuveirunnar sem ekki hefur áður sést hér á landi. Þetta sagði Þórólfur Guðnason, sóttvarnalæknir í Morgunútvarpi Rásar 2 í morgun.
Þar sagði Þórólfur að veiran sé enn á sveimi úti í samfélaginu. Þórólfur gaf það upp að tölur yfir smit gærdagsins séu skárri en tölurnar sem birtust yfir smit í fyrradag, þegar 11 greindust og sex utan sóttkvíar. Hann sagðist þó ekki vera með nákvæma tölu.
„Það eru smit þarna úti, alveg klárlega, en ekki mikið. Það getur verið að lúra þarna undir yfirborðinu í einhvern tíma áður en það brjótast út stærri hópsýkingar,“ segir Þórólfur.
Hann segist vona að tilfelli um ferðamann sem smitaðist aftur af COVID sé einstakt.
„Ég vona að þetta sé bara einstakt tilfelli, að við förum ekki að sjá nokkuð svona lagað því það setur hlutina í uppnám og þá þurfum við að vera með nýja nálgun. Ég myndi telja á þessu stigi að þetta væri undantekning frekar en eitthvað annað. Við þurfum að vera á varðbergi og það taka sýni af fólki með vottorð á landamærunum er algjörlega nauðsynlegt, “ segir Þórólfur.