„Drullist í gang, Þórólfur, eða ég fer að læra sóttvarnarlækninn,“ sagði Kristján Óli Sigurðsson sparkspekingur í hlaðvarpsþætti Hjörvars Hafliðasonar, Dr. Football.
Sitt sýnist hverjum um þau tilmæli sóttvarnarlæknis að gera hlé á æfingum og keppni í íþróttum með snertingu til 13. ágúst næstkomandi. Þetta þýðir að hlé hefur verið gert á Íslandsmótinu í knattspyrnu, fótboltaunnendum til lítillar gleði. Hvatti ÍSÍ íþróttahreyfinguna til að fara að þessum tilmælum heilbrigðisyfirvalda.
Í þættinum var fjallað um þessa ákvörðun og sagðist Kristján ekki skilja hvers vegna ekki sé hægt að spila fótbolta á sama tíma og skemmtistaðir eru opnir til 23 á kvöldin.
Kristján sagði að sáralitlar líkur væri á smiti í fótbolta, bæði á æfingum og í leikjum. Benti hann á dæmi máli sínu til stuðnings. „Það var hálfpartinn allt stoppað í kvennaboltanum þegar Breiðabliksstelpan kom smituð heim,“ sagði Kristján en lið Breiðabliks og Selfoss fóru í sóttkví vegna smitsins. Sem betur fer smitaðist enginn annar úr umræddum liðum þrátt fyrir æfingar og leik milli liðanna.
Þá smitaðist leikmaður Stjörnunnar af veirunni sem varð til þess að leikmannahópur liðsins þurfti að fara í sóttkví. Benti Mikael á að enginn annar úr Stjörnuliðinu hafi smitast.
„Þetta gerðist í einhverjum partýum, af hverju eru ekki partý bönnuð og fótboltinn leyfður? Drullist í gang, Þórólfur, eða ég fer að læra sóttvarnarlækninn,“ sagði Kristján.
Hjörvar Hafliðason, umsjónarmaður Dr. Football, segir á Twitter að fótbolti sé öruggur staður til að vera á. „Game on takk!“ segir hann.
Guðjón Guðmundsson, einn reynslumesti íþróttafréttamaður þjóðarinnar, leggur orð í belg og segir: „Vandamálið hér heima er fyrst og síðast lasburða yfirvald hreyfingarinnar það vill segja ÍSÍ. Bírógratar sem vita lítið um afreksstarf.“
Geir Þorsteinsson, fyrrverandi formaður KSÍ, sagði á dögunum að þátttaka íslenskra félaga í Evrópuleikjum væri undir, bæði í ár og á næsta ári. Mikilvægt væri að finna leið til að bjarga Íslandsmótinu þetta sumarið.
„Gífurlegir hagsmunir íslenskrar knattspyrnu byggja á því að ÍM2020 í efstu deild(um) fari fram og leikmenn stundi æfingar eins og venjulega með tilheyrandi sóttvörnum. Finna þarf sátt og leiðir til halda hefðbundnum og skipulögðum æfingum áfram í efstu deild(um) í fótbolta til að bjarga ÍM2020, öðrum mótum þarf mögulega að ljúka og ný mót að fara fram 2021 eins og vera ber. Leikmenn eru ekki vélar sem slökkva má á og endurræsa eftir þörfum.“