Anna Sigrún Baldursdóttir, aðstoðarmaður Páls Matthíassonar, forstjóra Landspítala, segir að Kári Stefánsson, forstjóri Íslenskrar erfðagreiningar, hafi verið dónalegur og ósanngjarn í viðtalinu í Kastljósi í gærkvöldi.
Viðtalið við Kára hefur vakið talsverða athygli en þar gagnrýndi hann til dæmis Svandísi Svavarsdóttur heilbrigðisráðherra fyrir að minnast ekki á Íslenska erfðagreiningu í þakkarræðu sinni á upplýsingafundi almannavarnadeildar ríkislögreglustjóra í vikunni.
Þá sagði hann að Íslensk erfðagreining myndi að óbreyttu ekki taka þátt í skimunum þegar landamærin verða opnuð þann 15. júní næstkomandi ef verkefnið yrði unnið undir stjórn heilbrigðisráðuneytisins.
Kári fór mikinn í viðtalinu og sagði Svandísi stundum haga sér eins og „lítil tíu ára stelpa sem lætur ekki neinn segja sér neinn skapaðan hlut.“
Í færslu á Facebook-síðu sinni eftir viðtalið sagði Anna Sigrún: „Þetta var auðvitað viðtal ársins sem Einar Þorsteinsson átti við Kára Stefánsson í Kastljósi kvöldsins. Spyrillinn brilleraði og Kári var, ja, Kári,“ sagði hún og hrósaði Einar Þorsteinssyni sem tók umrætt viðtal.
Margrét Tryggvadóttir, fyrrverandi þingkona, segir í athugasemd undir að viðtalið hafi haft skemmtigildi en hún viti þó ekki með upplýsingagildið. Því svarar Anna Sigrún: „Ekki nokkurt annað en að Kári vill fá lífsýni úr fólki á sínum forsendum.“ Hún bætir svo við: „Og svo kannski sýnir þetta að það er ekki snjallt að undirfjármagna opinbera stofnun og treysta á einkafyrirtæki um opinbera þjónustu þegar á reynir. Just say´n.“
Í umræðum undir færslunni er bent á að taka mætti fastar á Kára. „Hann fær alltaf að vaða uppi án nokkurrar viðspyrnu. En það var fyndið að sjá hrokafyllsta mann Íslands væna aðra um hroka.“ Þessu svarar Anna Sigrún: „Hann var auðvitað fáránlega dónalegur og ósanngjarn - var semsagt Kári.“
Hún virðist svo gefa í skyn að Kári sé karlremba því gagnrýni hans að undanförnu hafi að stóru leyti beinst að stofnunum eða ráðuneytum þar sem konur eru í forsvari.
„Helga Þórisdóttir er forstjóri Persónuverndar. Svandís Svavarsdóttir er heilbrigðisráðherra. Hildur Helgadóttir var formaður verkefnisstjórnarinnar og Sunna Snædal er formaður Vísindasiðanefndar. Einhver gæti mögulega séð eitthvað trend hérna.“