Alls greindust 86 kórónuveirusmit hér á landi og hafa þau ekki verið fleiri á einum degi síðan 13. Október síðastliðinn þegar þau voru 88.
Góðu fréttirnar eru þær að mikill meirihluti þeirra sem greindust voru í sóttkví, eða rúmlega 70%. Aðeins 24 voru utan sóttkvíar. Alls eru 58 á sjúkrahúsi núna og einn á gjörgæsludeild.
Þetta kemur fram í tölum sem birtust á COVID.is nú klukkan 11.
Alls greindist 21 smit á landamærunum. Tíu greindust í fyrri skimun, einn í seinni skimun og beðið er niðurstöðu mótefnamælingar frá tíu einstaklingum.
Fjórtán daga nýgengi smita á hverja hundrað þúsund íbúa er nú 221 og stendur nánast í stað síðan í gær. Hæst fór það í 291,5 um miðjan októbermánuð.
Nítján einstaklingar, 90 ára eða eldri, eru nú í einangrun vegna COVID-19 og 32 einstaklingar á aldrinum 80 til 89 ára. Langfjölmennasti hópurinn er sem fyrr hópurinn á aldrinum 18 til 29 ára. 277 einstaklingar á því aldursbili eru í einangrun.
