44 prósent fatlaðs fólks búa við mikla fátækt og eru í sömu stöðu og árið 2009. Þetta sýnir ný skýrsla vörðu fyrir ÖBÍ að sögn Þuríðar Hörpu Sigurðardóttir, formanns Öryrkjubandalagsins í samtali við Stöð 2 í kvöld vegna nýrrar rannsóknar á högum fatlaðs fólks.
Varða rannsóknarstofnun vinnumarkaðarins kynnti niðurstöður hennar í dag. Kom fram að um 80 prósent fatlaðs fólks á erfitt eða mjög erfitt með að ná endum saman og sama hlutfall hefur neitað sér um heilbrigðisþjónustu.
„Það kom mér í raun fátt á óvart,“ sagði Þuríður um málið í beinni útsendingu í kvöldfréttum Stöðvar 2.
„Það er sláandi að þessi skýrsla dregur það skýrt fram að fatlað fólk lifir ekki á lífeyri tryggingastofnunar og sýnir mikilvægi þess að örorkulífeyrir sé hækkaður,“ segir Þuríður.
Þá segir hún niðurstöðurnar sýna að 44 prósent fatlaðs fólk lifi við mikla fátækt og sé í sömu stöðu og það var árið 2009 eftir bankahrun. „Það hefur ekkert breyst þrátt fyrir mjög mikið hagvaxtarskeið,“ segir Þuríður.
„Einstæðir foreldrar og einstæðir karlar koma verst út. 90 prósent þeirra ná ekki endum saman,“ segir Þuríður. Það þýði að börn þeirra alist upp í fátækt.
Þá segir Þuríður það ekki hafa komið fram áður hve margir meðal fatlaðra þurfa að reiða sig á fjárhagstoð frá ættingjum og vinum. „Við höfum ekki séð þessa statistík áður. 41 prósent fatlaðs fólks reiðir sig á fjárhagsaðstoð frá ættingjum og vinum.“
